Hyundai og Kia bæta svikin
Setja bókamerki
Suður-kóresku bílaframleiðendurnir Hyundai og Kia báðu viðskiptavini sína afsökunar í dag og segjast skammast sín fyrir að hafa svikið þá með því að ljúga til um eldsneytisnotkun þeirra.
Féllust bílsmiðirnir á í dag, að bæta viðskiptavinum sínum í Bandaríkjunum og Kanada svikin með fjárgreiðslum. Þeir gáfu upp, að bílar þeirra neyttu minna eldsneytis en þeir raunverulega gerðu.
Það voru bandaríska umhverfisstofnunin (EPA) sem leiddi svindlið í ljós. Niðurstaða hennar var sú, að Hyundai og Kia höfðu ranglega tilgreint eldsneytisþörf fjölda bílgerða af árgerðunum 2011-2013 sem seldar voru í Bandaríkjunum og Kanada.
Ábendingar nokkurra kaupenda um að upplýsingarnar stæðust ekki urðu til þess að rannsókn var hrundið af stað. Reynsla þeirra var að talsvert vantaði á að bílar þeirra drægju þá vegalengd á galloni bensíns sem framleiðendurnir höfðu haldið fram.
Hyundai og Kia segja að um sé að ræða tæplega 1,1 milljón bíla af árgerðunum 2011-2013 sem seldir voru í Norður-Ameríku; um 900.000 í Bandaríkjunum og 172.000 í Kanada.
agas@mbl.is
