Er Barbíbílatorfæra besta mótorsportið í Ameríku?
Setja bókamerki
Í Ameríkunni er iðkuð öðruvísi torfæra en hér á landi. Í stuttu máli gengur hún út á að setja stórar toppgrindur og slaglanga fjöðrun á venjulega jeppa og keppa svo um hver kemst hægast upp á stóran stein. Eða allavega eitthvað mjög nálægt því.
En djúpt í bandarísku þjóðarsálinni blundar þörfin fyrir meiri hasar, meiri hraða, fleiri veltur. Eins og í íslensku torfærunni. Því miður er ekki keppt í slíkri torfæru þar í landi svo úr varð nýtt mótorsport, sem er sennilega það besta sem hefur orðið til í Ameríkunni: Barbíbílatorfæra.
Í stuttu máli er keppt á leikfangabílum sem eru nógu stórir til að börn geti setið í þeim. Það eru þó engin börn sem keppa, heldur fulltíða fólk (stundum rúmlega það) sem þeysir niður brattar brekkur í kappi hvað við annað. Að sjálfsögðu eru allir í viðurkenndum öryggisbúnaði, eins og hettupeysum, gallabuxum og vinnuhönskum.
Það skortir ekkert á spennuna og hraðann og veltur og árekstrar eru tíð sjón. Bílavefurinn Jalopnik birti nýlega nokkur myndbönd af Barbíbílatorfæru, og við látum þau bestu fylgja hér fyrir neðan.
