Bílatölvan kemur upp um glannaakstur
Setja bókamerki
Hér áður fyrr þurftu lögreglumenn oft að rannsaka vettvang bílslysa með því að mæla t.d. lengd bremsufara og þannig áætla hraða ökutækjanna.
Nú er svo komið að tölvurnar í bílunum geyma mikið magn upplýsinga um aksturshraða og ökulag og eru bæði yfirvöld og tryggingafélög farin að nýta þessi gögn til að finna út hjá hverjum sökin liggur í árekstrum.
New York Times greinir frá embættismanni í Massachusetts sem komst að því með erfiðu leiðinni að bíllinn getur ekki þagað yfir leyndarmálum ökumannsins. Hann klessukeyrði Ford Crown Victoria-bifreið sína af árgerð 2011 en slapp nokkuð vel sjálfur. Þegar lögreglumenn bar að garði sagðist ökumaðurinn hafa bæði ekið á rólegum hraða og notað bílbelti. Þegar bílatölvan var skoðuð kom hins vegar í ljós að bíllinn fór á um 160 km/klst. hraða og bílbeltið ekki spennt.
Fyrir vikið fékk ökumaðurinn háa sekt ofan á það að hafa eyðilagt bílinn sinn.
Nær allir bílar skrá upplýsingar
NYT segir um 96% allra nýrra bíla sem seldir eru í Bandaríkjunum vera með n.k. ökurita, „svartan kassa“ sem virkar ekki ósvipað og flugritinn í flugvélum. Kassinn er vandlega varinn gegn hnjaski og upplýsingarnar sem hann safnar hafa m.a. nýst bílaframleiðendum til að meta og mæla akstursframmistöðu ökutækja sinna. Í auknum mæli eru þó gögnin líka að nýtast við rannsókn bílslysa og glæpamála og hefur það vakið spurningar um friðhelgi einkalífsins.
Er deilt um bæði hver á upplýsingarnar á ökuritanum, hvernig má nota upplýsingarnar þannig að teljist lögmætt og svo hversu áreiðanleg gögnin eru.
Í fjórtán ríkjum Bandaríkjanna hafa verið sett lög sem heimila löggæsluaðilum og sækjendum í skaðabótamálum að nálgast upplýsingarnar á ökuritum bíla að fengnum dómsúrskurði og gildir þá einu þó að upplýsingarnar á ritanum séu strangt til tekið eign eiganda bílsins.
Ólíkt flugritunum í flugvélum, sem safnar öllum upplýsingum og samskiptum út í gegnum hverja flugferð, geyma ökuritarnir í bílum þó aðeins upplýsingar sem safnað var nokkrum sekúndum áður en bíllinn klessir eða loftpúði blæs út. Talsmenn einstaklingsfrelsis hafa meðal annars áhyggjur af að gagnasöfnunartíminn muni verða æ lengri og að byrjað verði að safna öðrum gögnum á borð við GPS-hnit.
ai@mbl.is
