Nýtt Cadillac flaggskip innan tveggja ára
Setja bókamerki
Miklar vangaveltur hafa átt sér stað vestanhafs varðandi áætlað Cadillac flaggskip. Þær höfðu verið miklar en eftir að Cadillac sagðist vera hætt við ofurlúxus bíl fyrr í mánuðinum til að einbeita sér að nýju flaggskipi þá hafa þær komist á flug. Til að slá á vangavelturnar eða til að auka spennuna enn frekar þá hefur framkvæmdastjóri GM, Dan Akerson, látið hafa það eftir sér að vinna við nýtt flaggskip sé í fullum gangi.
Eina sem Dan Akerson gaf út um flaggskipið er að það mun fara í framleiðslu á næstu tveimur árum. Það er þó talið nokkuð ljóst að bíllinn muni bæði verða fáanlegur með aftur- og fjórhjóladrifi og svipa til nýs Cadillac CTS.
Þrátt fyrir að nýja flaggskipið muni fara í framleiðslu þá mun Cadillac XTS, sem er í dag stærsti bíllinn í Cadillac fjölskyldunni, ekki vera tekinn úr sölu þar sem Cadillac telur enn vera eftirspurn eftir stórum framhjóladrifnum lúxusbíl.
