Gangbrautir illa eða rangt merktar
Setja bókamerki
Mörgu er ábótavant varðandi merkingu gangbrauta víðs vegar um landið. Til dæmis eru sebramerktar gangbrautir áberandi sjaldgæfar í Reykjavík. Þá er frágangur og lýsing gangbrauta einnig slæmt sums staðar, og á mörgum stöðum eru umferðarlög og reglugerðir um merkingar þverbrotnar.
Þetta kemur fram í niðurstöðum umferðarátaksins „Gangbraut - Já takk“ sem FÍB stóð fyrir. Félagið fékk almenning og fjölmiðla í lið með sér og safnaði myndum af gangbrautum víðs vegar að af landinu, þar sem grunur lék á að einhverju væri ábótavant. Sérstaklega var fylgst með gönguleiðum skólabarna.
Sérfræðingar FÍB yfirfóru myndirnar og fóru á vettvang og mátu aðstæður samkvæmt stöðluðum vinnubrögðum og aðferðum Euro RAP vegrýninnar.
Hægt er að skoða ítarlegar niðurstöður verkefnisins með því að smella hér, en meðal þess helsta sem fram kom er eftirfarandi:
1. Mjög verulegt misræmi er milli sveitarfélaga hvað varðar frágang á gangbrautum. Verulega skortir á samræmi og samræmdar reglur og skilgreiningar um það hvað teljist fullgild gangbraut og hvernig beri að merkja hana. Eftirlit með þessum málum virðist ekkert vera og lögum og reglugerðum lítt eða ekki framfylgt.
2. Umferðarlög og reglugerðir um merkingar eru þverbrotnar á mörgum stöðum.
3. Í Reykjavík er það áberandi hversu sebramerktar gangbrautir eru sjaldgæfar.
4. Á Ísafirði eru sebramerkingar gangbrauta með ágætum en gangbrautarmerki sem upplýsa ökumenn um að gangbraut sé framundan eru afar fáséð. Gangbrautamerki eru forsenda þess að gönguleiðin hafi lagagildi sem gangbraut.
5. Í nágrannasveitarfélögum Reykjavíkur, Kópavogi, Garðabæ og Hafnarfirði eru fyrrnefndar merkingar víðast hvar góðar og mun betri en í höfuðborginni.
6. Skilti sem áminna ökumenn um að sýna varúð því gangbraut sé framundan og í nánd eru allsstaðar afar sjaldgæf.
7. Lýsingu við gangbrautir er víða ábótavant.
8. Sýnileiki gangandi vegfarenda er oft takmarkaður, t.d. vegna þess að bílastæði, einhverskonar veggir eða trjágróður eru mjög nærri gangbraut og skerða útsýni hinna akandi til gönguleiðarinnar og næsta nágrennis hennar.
9. Talsvert er um misvísandi yfirborðsmerkingar, merkingar sem ekki eru sebramerkingar og eiga sér því ekki stoð í lögum og reglum.
10. Ekkert samræmi er í notkun hraðahindrandi mannvirkja við gangbrautir.
