Ekið of hratt og stúlkurnar voru ekki í bílbeltum

Rannsóknarnefnd samgönguslysa telur mikilvægt að ráðist verði í aðgerðir til að draga úr hraðakstri á Suðurlandsvegi milli Víkur og Kirkjubæjarklausturs.

Þetta kemur m.a. fram í skýrslu nefndarinnar um banaslys sem varð á Suðurlandsvegi við Meðallandsveg 4. ágúst 2013. Tvær stúlkur, 15 og 16 ára, létust í slysinu en þær voru ekki í öryggisbeltum.

Fólk í tveimur bílum var í samfloti frá Reykjavík austur að Jökulsárlóni. Veður var ágætt og akstursaðstæður góðar. Bílarnir óku á 100-120 km/klst. hraða. Leyfilegur hámarkshraði þarna er 90 km/klst. Vitni í hinum bílnum sögðu að skömmu fyrir slysið hefði bíllinn farið fram úr þeim á 130-140 km/klst. hraða og lent í lausamöl hægra megin í beinu framhaldi af framúrakstrinum. Ökumaðurinn reyndi að beina bílnum aftur upp á veginn en fór yfir veginn og lenti út af vinstra megin þar sem hann valt.