Japanir lækka líka bíla í Kína
Setja bókamerki
Rannsókn kínverskra samkeppnisyfirvalda á starfsemi erlendra bílaframleiðenda í Kína hefur borið mikinn árangur frá sjónarhóli neytenda.
Í síðustu viku sögðum við frá því hvernig rannsóknin hefði afhjúpað tilhneigingu til einokunar og hringamyndunar af hálfu þýskra bílsmiða, sem allir lækkuðu varahlutaverð stórlega í kjölfar skoðunarinnar.
Og því dýpra sem kafað hefur verið því meiri árangur. Kínverskir fjölmiðlar hafa farið hamförum yfir þessu og sakað erlenda bílsmiði um að okra á bílum, varahlutum og viðhaldsþjónustu.
Hingað til hefur athygli samkeppnisyfirvaldanna aðallega beinst að framleiðendum lúxusbíla, svo sem BMW, Audi, Mercedes-Benz, Chrysler og Jaguar Land Rover.
En nú er röðin komin að öðrum og hafa japönsku bílsmiðirnar Toyota og Honda stigið fram og gripið til verðlækkana.
