Fyrstu myndir af risaverksmiðju Tesla

Elon Musk, stofnandi Tesla, er að byggja risavaxna verksmiðju sem nefnist Gigafactory í Nevada í Bandaríkjunum. Verksmiðjan verður fullkláruð árið 2020 og hingað til hefur ljósmyndurum ekki verið hleypt þar inn.

Ljósmyndarinn James Lipman fékk þó að kíkja inn á dögunum og birti hann nokkrar myndir á Instagram síðu sinni. Talið er líklegt að hann hafi verið að ljósmynda kynningarefni fyrir fyrirtækið.

Í verksmiðjunni verða lithium-ion rafhlöður framleiddar fyrir rafmagnsbíla Tesla. Samkvæmt því sem fram kemur á heimasíðu fyrirtækisins gerir Tesla fyrir að framleiða 500 þúsund bíla á ári frá 2015 til 2020. Til þess að mæta þeirri þörf þarf aukna framleiðslu á rafhlöðum.

Fjárfestingin í verksmiðjunni nemur fimm milljörðum Bandaríkjadala, eða um 645 milljörðum íslenskra króna. Í verksmiðjunni verða til störf fyrir 6.500 starfsmenn og talið er að hún skapi störf fyrir hátt í 4.000 manns á byggingartíma.

• 1 blogg um fréttina

Bloggað um fréttina

• Ómar Ragnarsson: Aldahvörf og dögun í orkumálum.