Kraftmiklir í Porsche-salnum

Áhugamenn um kraftmikla og fallega bíla fengu ríflega fyrir snúð sinn er þeim bauðst að gera sér glaðan dag á Stórsýningu Porsche-hjá Bílabúð Benna laugardaginn 13. ágúst síðastliðinn, en þá voru meðal annars glæsigripirnir Porsche 718 Boxster og Cayman GT4 frumsýndir. Hér var um verulega spennandi tækifæri að ræða fyrir bílaáhugamenn því Porsche Cayman GT4 er framleiddur í takmörkuðu upplagi og hefur þess utan hlotið einróma lof bílablaðamanna um allan heim.

Boxster er orðinn 718

„Boxster-bílarnir frá Porsche bera núna númer eins og aðrir sportbílar í Porsche-fjölskyldunni og er það númerið 718,“ segir Thomas Már Gregers, sölustjóri Porsche á Íslandi í fréttatilkynningu. „Hann er kominn með geysiöfluga 4 cylindra vél með túrbínu. Með því hefur koltvísýringsgildið og lækkað umtalsvert sem gerir það að verkum að bíllinn er á hagstæðara verði en áður.“

Verulega spennandi útfærslur

Í tilefni af frumsýningunni sló Bílabúð Benna upp stórsýningu og flutti til landsins sérstaklega nokkrar verulega spennandi útfærslur af Porsche, sem fengu að glansa í salnum með frumsýningarstjörnunum í Porsche-salnum á Vagnhöfða 23. Eins og sjá má á meðfylgjandi myndum var þar margt augnakonfektið til sýnis enda gefst tækifæri af þessu tagi ekki á hverjum degi.

jonagnar@mbl.is