Brjóstgóð hraðavörn
Setja bókamerki
Það verður ekki af rússneskum konum skafið, þær eru hugmyndaríkar þegar svo ber undir. Hefur tveimur ungum konum tekist að draga úr ökuhraða með heldur óvenjulegum hætti. Alla vega daginn sem þær beittu aðferð sinni.
Gengið hefur fram af íbúum í héraðinu sem kennt er við Nizhny Novgorod hversu óhlýðnir ökumenn hafa verið gagnvart mörkum hámarkshraða. Bæjaryfirvöldum þótti meira en nóg komið og fengu ungu konurnar í lið með sér og samtökum sem reynt höfðu árangurslítið að stuðla að hóflegum bílhraða á bæjarsvæðinu.
Gengu þær hálfnaktar mót umferðinni í kanti umferðargötu þar sem leyfilegur hámarkshraði var 60 km. Sýndu mælingar að hraði bílanna væri meiri hófu þær á loft skiltum og veifuðu framan í bílstjórana til að minna á hver mesti leyfilegur hraði væri.
Bæjarstjórnin batt vonir við að þetta ögrandi bragð myndi sannfæra ökumenn um að lyfta fæti aðeins af bensíngjöfinni. Og sú varð raunin, að sögn umferðaröryggissamtakanna fyrrnefndu, „Autodvijenie“. Að þeirra sögn heppnaðist brellan því flestir ökumennirnir - sem að langmestu leyti voru karlmenn - hægðu ferðina, sem að einhverju leyti má sjá á meðfylgjandi myndskeiði.
Fylgir ekki fregnum hvort bílstjórarnir hafi kitlað pinna bensíngjafarinnar á ný er fljóðin fögru voru úr augsýn.
Rússneskir vegir eru með þeim varasamari í veröldinni en á þeim farast um 30.000 manns í umferðarslysum á ári.
