30.000 rafbílar í pöntun
Setja bókamerki
Þrjátíu þúsund Norðmenn eru í biðröð eftir nýjum rafbíl. Flestir, eða þriðjungurinn, hafa skráð sig fyrir Tesla Model 3 og næstflestir fyrir hinum nýja Audi e-tron.
Forpöntun bíla varð að nokkurs konar æði eftir að Tesla hóf að krefjast afar hófsamlegrar innborgunar við pöntun bíla sem fyrirtækið var ekki einu sinni byrjað að smíða. Allir bílsmiðir - sér í lagi rafbílasmiðir - hvetja neytendur nú ákaft og bjóða þeim lága innborgun , einnig löngu áður en framleiðsla viðkomandi bíla er hafin.
Það þykir gefa vísbendingar um hvað markaðurinn vill og hver líkleg eftirspurn eftir nýjum rafbílum verður.
Forpantanirnar 30.000 í Noregi einar og sér eru álíka margar og heildarfjöldi rafbíla í Bretlandi. Eru þær sem hér segir, að sögn norska útvarpsins (NRK):
Tesla Model 3 (10.000)
Audi e-tron (6.300)
Hyundai Kona Electric (6.000)
Kia Niro Electric (5.900)
Ný kynslóð Nissan Leaf (3.000)
Jaguar I-Pace (3.000)
Porsche Taycan (2.300)
Mercedes EQC (2.200)
DS Crossback E-Tense (1.350)
BMW iX3 (1.000)
