Leggja frekar til lækkun hámarkshraða
Setja bókamerki
Vegagerðin telur að frekar ætti að lækka leyfðan ökuhraða almennrar umferðar á þjóðvegum landsins heldur en að hækka leyfðan ökuhraða vörubifreiða og annarra ökutækja sem nú er bundinn við 80 kílómetra hámarkshraða á klukkustund á bundnu slitlagi.
Þetta kemur fram í umsögn Vegagerðarinnar við stjórnarfrumvarp til nýrra umferðarlaga sem er til umfjöllunar í umhverfis- og samgöngunefnd Alþingis.
Í greinargerð með frumvarpinu kemur fram að leitast skuli eins og kostur er við að samræma hraða bifreiða á þjóðvegum landsins. Bent er á að bifreiðum sem eru meira en 3,5 tonn að leyfðri heildarþyngd, svo sem flutningabifreiðum, sé óheimilt að aka hraðar en 80 km á klst.
Vegagerðin bendir á í umsögn sinni að almennt sé talið að umferðaröryggissjónarmið mæli gegn því að auka umferðarhraða á venjulegum tveggja akreina vegum. Hættan á að láta lífið í árekstri á hraðanum 90 km/klst. sé 70% meiri en við árekstur á 80 km/klst.
„í Svíþjóð er nú unnið að því að lækka leyfilegan hámarkshraða í 80 km/klst. á hefðbundnum tveggja akreina vegum þar sem akstursstefnur eru ekki aðgreindar. Þar eru þó undanskildir vegir með mjög lítilli umferð,“ kemur fram í umsögn Vegagerðarinnar.
