Þriggja mánaða borgunarfrí

Hvernig litist mönnum á að fá annaðhvort nýjan Seat eða Skoda og þurfa ekki að afhenda krónu þegar tekið er við bílnum og rennt af stað á brott frá umboðinu?

Upp á þetta bjóða bæði umboðin í Bretlandi í þeim tilgangi að reyna að örva bílasölu sem hrunið hefur nánast til grunna vegna kórónuveirufaraldursins.

Kaupendum nýrra Seat og Skoda er boðið að borga ekki krónu fyrir bílana fyrr en eftir þrjá mánuði hið fyrsta. Án boða sem þessa hefðu margir ekki getað keypt bíla vegna kyrrsetningar mannlífsins í stríðinu gegn kórónuveirunni.

Bílaumboðin í Bretlandi hafa verið lokuð og ekki liggur fyrir hvenær þau hefja starfsemi aftur. Hægt er þó að kaupa bíla á heimasíðum umboðanna á netinu.

Vextir af láninu sem boðið er til kaupa á Seat eru 5,9% en 4,3% á Skoda. Nær tilboðið til allra módela Seat sem pöntuð eru fyrir 30. júní og afhent fyrir 1. október. Sömuleiðis ná tilboðin til allra módela Skoda sem fest eru fyrir 1. júlí. agas@mbl.is