Kia EV6 valinn Bíll ársins
Setja bókamerki
Rafbíllinn Kia EV6 hefur verið valinn Bíll ársins 2022. Þetta er sögð vera ein mesta viðurkenning sem bíll getur hlotið.
Frá þessu er greint í fréttatilkynningu frá Öskju, umboðsmaðila Kia á Íslandi. Þar kemur fram að Kia EV6 hafi fengið frábærar viðtökur síðan hann var frumsýndur á síðasta ári. Dómnefnd sem samanstóð af 59 bílablaðamönnum frá 22 Evrópulöndum valdi Kia EV6 Bíl ársins en hann hafði betur og hampaði titlinum eftir baráttu við Renault Megane E-Tech, Hyundai IONIQ 5, Peugeot 308, Škoda Enyaq iV, Ford Mustang Mach-E og Cupra Born. Valið um bíl ársins hefur verið haldið allar götur síðan 1965.
„Það er óvæntur en mikill heiður að Kia EV6 hljóti þennan stóra titil. Kia á það sannarlega skilið því það hefur verið unnið ötullega að því að gera Kia EV6 að því sem hann er. Framfarir Kia eru miklar og það skilar sér í þessum sigri,“ segir Frank Janssen, forseti Car of the Year verðlaunanna.
Kia EV6 hefur allt 528 km drægi á rafhlöðunni og getur hlaðið 10-80% á aðeins 18 mínútum. Hvort tveggja er með því besta sem þekkist í rafbílaheiminum, segir í tilkynningu Öskju.
„Það er gríðarlega mikill heiður að vinna Bíl ársins 2022. Þetta er í fyrsta skipti sem bíll frá Kia vinnur til þessara virtu verðlauna. Kia EV6 er tímamótabíll og bíður upp á allt það besta sem rafbíll,“ er haft eftir Jason Jeong, forstjóra hjá Kia Europe.
