Fiat opnar bílaverksmiðju í Alsír
Setja bókamerki
Ítalski bílaframleiðandinn Fiat opnaði í dag fyrstu bílaverksmiðju sína í Alsír. Er vonast til að tilkoma verksmiðjunnar muni lífga upp á bílamarkaðinn í landinu.
Kaup og sala á bílum hefur gengið illa eftir að stjórnvöld í Alsír tóku þá ákvörðun árið 2019 að stöðva innflutning bifreiða og að loka skyldi bílaverksmiðjum í landinu.
Forseti Alsír, Abdelmadjid Tebboune, sagði á sínum tíma að eini tilgangur verskmiðjanna væri að setja dekk á bíla sem þegar væri búið að setja saman í skiptum fyrir ríflegar skattaívilnanir.
Verksmiðjan sem opnaði í dag í borginni Oran er fyrsta verksmiðjan sem hefur verið opnuð í forsetatíð Tebboune. Mun verksmiðjan ná yfir fjörtíu hektara land og er fjárfesting upp á rúma þrjátíu milljarða króna og mun skaffa 1.200 störf.
Valentino Valentini hjá Fiat sagði að versmiðjunni sé ætlað að framleiða tæknilega fullkomna bíla, þeirrar gerðar sem draga úr neikvæðum loftslagsáhrifum.
