Bandaríska flugfélagið American Airlines hótaði að vísa konu frá borði á dögunum vegna þess að skilaboð á stuttermabol hennar voru talin móðgandi. 

Konan, Swati Runi Goyal, var á leið frá Flórída til Las Vegas hinn 30. október síðastliðinn þegar bolur hennar með áletruninni „Hail Satan“ eða „Fögnum kölska“ vakti athygli flugþjóna í vélinni. 

Hún segir tvo flugþjóna hafa orðið gríðarlega reiða og krafist þess að hún skipti um bol áður en vélin færi í loftið. 

„Þetta er kaldhæðnislegur bolur. Fólki finnst hann vanalega fyndinn eða sendir mér þumal því það skilur skilaboðin á honum,“ sagði Goyal í viðtali við Buzzfeed News. 

Goyal segist ekki vera djöfladýrkandi en tilheyrir satanísku musteri, sem leggur öll trúarbrögð og andsatanísk trúarsamtök að jöfnu. 

Fluginu var seinkað á meðan þjónustufulltrúi hjá flugfélaginu kom um borð til að tryggja að Goyal skipti um föt áður en vélin færi í loftið. Loks fékk hún peysu hjá eiginmanni sínum til þess að fela skilaboðin. 

Hún segist hafa verið niðurlægð, en var þakklát fyrir að aðrir farþegar í fluginu studdu hana og sögðu að sér fyndist bolurinn fyndinn. 

Goyal kvartaði til flugvélagsins vegna atviksins og fékk stöðluð skilaboð til baka um að farþegar um borð í vélum American Airlines þyrftu að fylgja ákveðnum reglum. 

Eftir að hún skrifaði um reynslu sína á Twitter hins vegar fékk hún þau svör að fordómar væru ekki liðnir hjá American Airlines. Í kjölfarið sagði talsmaður flugfélagsins að þau hefðu haft samband við Goyal til þess að biðjast afsökunar.

Tengdar fréttir

Furðulegt á ferðalögum

Aðdáendur Drescher munu flykkjast til Ástralíu

• Hefur heimsótt öll lönd í heimi og segir Ísland í miklu uppáhaldi
• Ítölsk draugaeyja sem fær hárin til að rísa
• Öskrandi kona í berginu við Hjörleifshöfða
• Kanadískur maður komst í hann krappann

» Fleiri tengdar fréttir

• 1 blogg um fréttina

Bloggað um fréttina

• Geir Ágústsson: Listin að móðga