104 ára gömul í 21. hjónabandið

33 ára gamall maður í norðurhluta Malasíu hefur kvænst 104 ára gamalli konu, að sögn malasískra dagblaða í gær. Er þetta í 21. skipti sem konan, Wook Kundor, gengur í hjónaband. Hún segist vona að í þetta sinn endist hjónabandið.

Þetta er hins vegar fyrsta hjónaband brúðgumans, Muhamad Noor Che Musa en þau kynntust þegar hann leigði hjá henni. Hann segist í fyrstu hafa fundið til með konunni vegna þess að hún hafi verið barnlaus, gömul og einmana en gagnkvæm virðing og vinátta þeirra hafi smám saman breyst í ást.

"Ég sækist ekki eftir peningum frá henni, enda er hún fátæk," er haft eftir Muhamad. "Áður en ég kynntist Wook dvaldi ég aldrei lengi á sama stað." Hann segir það hafa verið vilja Guðs að þau skyldu ná saman.

Ekki kom fram hvort einhverjir af fyrri eiginmönnum konunnar eru enn á lífi.