Hróarskelduhátíðin hefst í dag

Hin árlega tónlistarhátíð í Hróarskeldu hefst í dag. Þegar eru þúsundir mættar á svæðið til þess að taka þátt í stærstu útirokktónlistarhátíð Evrópu en hátíðin stendur yfir í fjóra daga. Meðal tónlistarmanna, sem fram koma á hátíðinni í ár, eru Bob Dylan, Morrissey, Deftones og Guns N' Roses.

Alls munu tæplega 160 listamenn koma fram á Hróarskelduhátíðinni. Samkvæmt skipuleggjendum hátíðarinnar eru 79 þúsund miðar seldir. Íslendingar fjölmenna yfirleitt á hátíðina og á vef Flugleiða kemur fram að uppselt sé í ferð á tónleikana á vegum flugfélagsins.

Hróarskelduhátíðin var í fyrsta skipti haldin árið 1971, en Hróarskelda er í nágrenni Kaupmannahafnar.

Fyrir sex árum átti sá hörmulegi atburður sér stað að níu ungir menn létust er þeir tróðust undir þegar aðdáendur Pearl Jam reyndu að komast sem næst sviðinu á tónleikum sveitarinnar.

• 1 blogg um fréttina

Bloggað um fréttina

• Anna Pála Sverrisdóttir: Vonandi skemmtiði ykkur vel