Veröld/Fólk | 1 Fólk - fréttir | mbl | 5.7.2006 | 12:06 | Uppfært 13:01

BB King kvaddi Montreux-djasshátíðina

BB King var í essinu sínu á Montreux-djasshátíðinni á mánudagskvöld. AP

Blúsgoðsögnin BB King hefur kvatt Montreux-djasshátíðina í Sviss fyrir fullt og allt eftir að hafa leikið þar í yfir 20 ár. King lék fyrir hátíðargesti í síðasta sinn í gær. Randy Crawford, Gladys Knigth og Barbara Hendricks voru á meðal þeirra sem stigu á stokk með King á tónleikunum sem fram fóru við Genfarvatn í gær. „Kannski ætti maður að hætta á hverju kvöldi,“ spaugaði King sem er áttræður.

King hefur staðfest að tónleikaferð hans um Evrópu verði sú síðasta, en hann hyggst halda áfram að leika blús í Bandaríkjunum. Blúsarinn fékk Grammy-verðlaun fyrir plötuna 80 á þessu ári.

King, sem hefur oft verið kallaður „Konungur blúsins“, fékk frábærar móttökur á tónleikunum í gær og átti hann erfitt með að leyna tilfinningum sínum. „Nú fer ég aftur að gráta,“ sagði hann við áheyrendur. „Þetta er rúsínan í pylsuendanum. Það væri ekki hægt að kveðja mig á betri hátt.“

Hann viðurkenndi einnig að heilsunni hrakaði smám saman. „Mig verkjar í hnén og bakið og hausinn á mér er litlu skárri. Ég man þó eftir því að ég er áttræður svo ég sat bara niður til þess að láta mér líða betur,“ sagði King.