Lukas sigraði í Rock Star Supernova

Kanadamaðurinn Lukas Rossi sigraði í raunveruleikaþættinum Rock Star Supernova í kvöld. Magni Ásgeirsson lenti í fjórða sæti í þættinum en Dilana varð í öðru sæti í keppninni. Ástralinn Toby varð í þriðja sæti í þættinum. Hins vegar er ljóst að Lukas mun ekki syngja með hljómsveitinni Supernova þar sem dómari í San Diego hefur gert hljómsveitinni Supernova að skipta um nafn, en samnefnd hljómsveit sem stofnuð var árið 1989 hefur staðið í málaferlum við fjölmiðlafyrirtækið CBC og félagana Tommy Lee, Jason Newsted og Gilby Clarke.

Komst dómarinn að þeirri niðurstöðu að viðkomandi aðilum væri héðan í frá óheimilt að flytja eða framleiða rokktónlist undir nafninu.

Hljómsveitin Supernova er helst þekkt fyrir lagið Chewbacca sem heyra mátti í kvikmyndinni Clerks, sem leikstjórinn Kevin Smith gerði árið 1994.

Meðlimir hljómsveitarinnar Supernova þurftu að gera upp á milli Magna og Toby um hvor yrði sendur heim þar sem þeir tveir fengu fæst atkvæði í atkvæðagreiðslunni síðastliðna nótt. Komst dómnefndin að þeirri niðurstöðu að Magni yrði sendur heim þrátt fyrir frábæra frammistöðu í keppninni. Magni þakkaði fjölskyldu sinni og aðdáendum víða um heim fyrir þann stuðning sem hann naut í keppninni.

Þau þrjú sem eftir voru tóku lagið á ný og eftir þá frammistöðu ákvað hljómsveitin að senda Toby heim.

Að sögn hljómsveitarmeðlima hlaut Lukas flest atkvæði í atkvæðagreiðslunni og sagðist hljómsveitin að sjálfsögðu vera sammála því vali. Buðu þeir Dilönu samning og tilkynntu að hún myndi syngja með Supernova á tónleikaferðalagi í febrúar.