Craig sár og reiður vegna persónulegra aðdróttana í sinn garð

Daniel Craig, sem fer með hlutverk James Bond í nýju Bond-myndinni, segist hafa sætt svívirðingum síðan hann fékk hlutverkið. Hafa Bond-aðdáendur gagnrýnt hann fyrir það meðal annars að geta ekki keyrt beinskiptan bíl, kunna ekki að spila á spil, vera með ljóst hár og jafnvel fyrir að vera með stór eyru.

Segir Craig í viðtali við bresku útgáfu GQ að þetta sé stundum eins og að vera kominn aftur í leikskóla. „Allir sem hafa sætt svona svívirðingum vita að það er særandi, og að enginn á að þurfa að þola það. Að sumu leyti langar mig til að svara fullum hálsi. Það eina sem maður getur gert er að standa sig. Það er engum eins annt um þessa mynd og mér.“

Craig segir það algjöra fjarstæðu að hann kunni ekki að keyra beinskipta bíla. Segist hann standa flestum framar á miklum hraða. Hann viðurkennir að einmitt núna eigi hann engan bíl, og að sá sem hann átti síðast hafi verið sjálfskiptur. „En flestir glæsibílar eru sjálfskiptir,“ segir hann.

• 1 blogg um fréttina

Bloggað um fréttina

• Stefán Friðrik Stefánsson: James Bond snýr aftur á hvíta tjaldið