Reykingaráðgjafi deyr úr lungnakrabba

Allen Carr, sem hefur hjálpað milljónum reykingamanna að hætta er látinn úr lungnakrabbameini. Carr, sem var 72 ára er hann lést, hætti að reykja fyrir 23 árum en áður reykti hann fimm pakka á dag.

Carr hafði margoft reynt að hætta þegar hann áttaði sig á því eitt sinn að hann leit ekki vandamálið réttum augum. Hann sagði að um leið og hann hafi áttað sig á því að hann var nikótínfíkill en ekki „bara" reykingamaður hafi honum tekist að sigrast á fíkninni. Í kjölfarið skrifaði hann bók sem er með vinsælustu sjálfshjálparbókum seinni tíma og hefur víst hjálpað milljónum manna að hætta að reykja.

Þegar Carr greindist með lungnakrabbamein síðastliðið sumar sagði hann að veikindi hans ættu að hvetja enn fleiri til þess að hætta að reykja. Hann sagði að allt frá því hann hætti að reykja fyrir 23 árum sé hann hamingjusamasti maður í heimi. Það hafi ekki breyst við að greinast með lungnakrabbamein, samkvæmt fréttavef BBC.

• 1 blogg um fréttina

Bloggað um fréttina

• Magnús Helgi Björgvinsson: Kannski að maður sé þá bara ekkert að hætta!!!!!