Bók tekin af markaði

Fyrsta skáld­saga Ei­ríks Guðmunds­son­ar, Und­ir himn­in­um, kom út hjá Bjarti í byrj­un nóv­em­ber og hlaut þá góðar viðtök­ur gagn­rýn­enda. Í frétta­til­kynn­ingu frá Bjarti seg­ir hins veg­ar að nú hafi verið ákveðið að taka bók­ina af markaði.

Í til­kynn­ing­unni seg­ir meðal ann­ars:

„Það er yf­ir­lýst mark­mið Bjarts að fegra mann­lífið með góðum skáld­verk­um. En nú ber nýtt við. Í fyrra­dag var les­inn dóm­ur um bók­ina í út­varpsþætt­in­um Víðsjá. Fyrr­um vígi höf­und­ar­ins, Ei­ríks Guðmunds­son­ar, sem löng­um var um­sjón­ar­maður þátt­ar­ins. Var talið nán­ast full­víst að Ei­rík­ur myndi slá í gegn á sín­um fornu heima­slóðum ... en þá, öll­um að óvör­um, kom hik á rit­dóm­ar­ann.

Auður Aðal­steins­dótt­ir sagði í Víðsjá að henni þætti sag­an frú­st­rer­andi, þótt hún væri fynd­in og margþætt. Hún sætt­ist við bók­ina þegar hún fór að hlæja upp­hátt, en gramd­ist aft­ur þegar hún týnd­ist í heim­speki­leg­um vanga­velt­um. Í stuttu máli var hún oft bál­reið út í bók­ina, sem hún sagði að væri vett­vang­ur enda­lausra leikja."

Enn­frem­ur seg­ir í til­kynn­ing­unni:

„Það er alls ekki ætl­un for­lags­ins að rugla fólk í rím­inu, hvað þá vekja gremju. Því hef­ur verið ákveðið eft­ir nokkra yf­ir­legu hjá for­laginu að taka bók Ei­ríks Guðmunds­son­ar, Und­ir himn­in­um, af markaði, svo ekki hljót­ist meiri skaði af bók­inni."