Mel Gibson segist ekki eiga 29 ára dóttur

Ástralski Hollywood-leikarinn og kvikmyndagerðarmaðurinn Mel Gibson hefur neitað orðrómi þess efnis að hin 29 ára Carmel Sloane sé dóttir hans. Carmel þessi heldur því fram að móðir sín, Marlyn, hafi verið á puttaferðlagi árið 1976 þegar Mel tók hana upp í bifreið sína. Hún segir þau svo hafa átt náin kynni í kjölfarið með þeim afleiðingum að hún var getin.

„Okkur er nauðugur einn kostur að fara lagalegu leiðina til að komast til botns í málinu. Einfalt DNA-próf mun leiða hið sanna í ljós," sagði Carmel við fjölmiðla.

Talsmaður Mels Gibsons hefur hins vegar hafnað fullyrðingum Carmel og segir að Mel, sem á sjö börn með konu sinni Robyn, kannist ekkert við málið.