Bloom og Cruz sögð nýjasta parið

Fregnir herma að Orlando Bloom og Penelope Cruz séu nýjasta parið í Hollywood. Bloom varð þrítugur á laugardaginn og hélt upp á afmælið á skemmtistaðnum Teddy's í Los Angeles. Vitni segja að Bloom og Cruz hafi verið saman allt kvöldið.

„Hún var aldrei langt frá honum, jafnvel þótt hann væri umkringdur miklum fjölda kvenna á dansgólfinu," segir ónefndur gestur á staðnum. Talið er að Bloom og Cruz hafi stungið saman nefjum frá því í september.

Leikarinn Leonardo DiCaprio, sem er góður vinur Blooms, kom einnig í veisluna, en ísraelska fyrirsætan Bar Refaeli, sem er kærasta DiCaprios, var hvergi sjáanleg. Í staðinn var leikarinn Djimon Hounsou með honum í för, en þeir léku saman í kvikmyndinni Blood Diamond.

Meðal annarra gesta í veislunni voru leikararnir Andy Garcia og Viggo Mortensen.