Persónulegir munir Parísar Hilton til sölu á Netinu

Fyrir þá sem ekki hafa þegar fengið sig fullsadda af Parísi Hilton hefur nú verið opnaður vefur, ParisExposed.com, þar sem m.a. er til sölu mikið úrval muna sem sagðir eru tilheyra henni.

Vefurinn var opnaður í gær og segjast þeir sem halda honum úti hafa á boðstólum mikið af myndum af Parísi, einkamyndböndum, dagbókum, ástarbréfum, upptökum af símtölum og símanúmer vina hennar.

Er hún sögð hafa skilið þetta allt eftir í geymsluhúsnæði í Los Angeles. Reikningar fyrir geymsluna hafi ekki verið greiddir og því hafi munirnir endað í höndum fasteignasala sem viljað hafi koma þeim í verð, að því er talsmaður Parísar tjáði Associated Press í gær.

• Blogga um frétt