Best að halda HM á Englandi 2018

F rank Beckenbauer , fyrrum leikmaður þýska landsliðsins í knattspyrnu, segir að England sé besti kosturinn fyrir heimsmeistaramótið sem fram fer árið 2018. Beckenbauer var nýverið kjörinn í framkvæmdastjórn Alþjóða knattspyrnusambandsins og ætlar hann að beita áhrifum sínum í þágu Englendinga ef England sækist eftir því að fá að halda keppnina. Næsta HM fer fram árið 2010 í S-Afríku.

Brasilíumaðurinn Kaka sem leikur með ítalska knattspyrnuliðinu AC Milan segir að hann hafi ekki áhuga á því að fara til Real Madrid á Spáni en mikið hefur verið rætt og ritað um að Kaka sé á förum frá AC Milan. Ramon Calderon forseti Real Madrid segir að Kaka sé enn á meðal þeirra efstu á óskalista félagsins. Brasilíumaðurinn Ronaldo er farinn frá Real Madrid til AC Milan en Kaka segir að hann hafi meiri áhuga á því að verða einn af hornsteinum AC Milan – líkt og Paolo Maldini hefur gert undanfarna tvo áratugi.

Það gengur ekkert hjá Real Madrid í spænsku deildinni en um helgina tapaði liðið 1:0 gegn Villareal. Jon Dahl Tomasson kom inná sem varamaður í liði Villareal en hann hefur verið lánaður til félagsins frá þýska liðinu Stuttgart.

Chris Coleman knattspyrnustjóri Fulham segir að ítalski framherjinn Vincenzo Montella sé einn af bestu leikmönnum liðsins en muni aðeins leika með Fulham út leiktíðina. Montella er 32 ára gamall og er samningsbundinn Roma. Ítalska félagið hefur ekki áhuga á að selja Montella til Fulham í lok leiktíðar.

R oberto Mancini þjálfari knattspyrnuliðsins Inter Mílanó frá Ítalíu segir að hann hafi áhuga á að reyna fyrir sér sem þjálfari í ensku úrvalsdeildinni. Undir hans stjórn hefur Inter leikið vel í vetur en Mancini hefur ekki skrifað undir nýjan samning við félagið. Sá orðrómur gengur á Englandi að Mancini sé fyrsti valkostur hjá Chelsea fari svo að Jose Mourinho yfirgefi liðið næsta sumar.

Roberto Donadoni landsliðsþjálfari Ítalíu segir að það komi vel til greina að velja þá Francesco Totti og Antonio Cassano í liðið á ný. Totti hefur ekki verið valinn í landsliðið eftir að Ítalía fagnaði sigri á heimsmeistaramótinu s.l. sumar. Donadoni sagði við ítalska fjölmiðla í gær að engin vandamál væru til staðar.