Frekari efasemdir um umdeild Pollock-verk

Rannsókn sem gerð var á vegum Listasafns Harvardháskóla hefur vakið frekari efasemdir um að þrjú málverk sem talið hefur verið að séu eftir bandaríska abstraktlistamanninn Jackson Pollock séu ekta.

Um þetta hafa staðið harðar deilur í listaheiminum. Í niðurstöðum Harvard-rannsóknarinnar er talið að í þessi umræddu þrjú verk hafi verið notuð málning sem ekki hafi verið komin á markað fyrr en eftir að Pollock var allur.

Um var að ræða rauða málningu sem kom ekki á almennan markað fyrr en í byrjun níunda áratugarins - löngu eftir að Pollock lést. Einnig segir í niðurstöðunum að í verkunum hafi fundist rauðgul og rauð málning sem ekki var fjöldaframleidd fyrir 1953, en talið var að umrædd verk hafi Pollock málað á árunum 1946-49.

Í fyrra var gerð munsturgreining á verkunum og var niðurstaða þeirrar rannsóknar sú, að líklega væri um falsanir að ræða.

Í nóvember greindi New York Times frá því að málverk eftir Pollock hefði selst á um 140 milljónir dollara, eða sem svarar rúmum níu og hálfum milljarði króna, og mun það vera hæsta verð sem nokkurntíma hefur verið greitt fyrir málverk.

• 1 blogg um fréttina

Bloggað um fréttina

• Svava frá Strandbergi : Af hverju í fjáranum fæddist ég ekki á undan Pollock?