Kínverska ríkið gefur plötuna út

Tónlistarmennirnir Kristján Kristjánsson og Magnús Eiríksson eru á leið til Kína þar sem þeir munu taka upp þriðju og síðustu „ferðalagaplötuna". Platan verður gefin út í Kína af ríkisreknu fyrirtæki sem nefnist Shanghai Audio and Video Publishing House. Í kjölfarið munu þeir KK og Maggi svo halda tónleika í miðborg Sjanghæ. Óttar Felix Hauksson hefur veg og vanda af verkefninu. „Mér tókst að opna dyrnar fyrir íslenska listamenn þegar ég var að gera samninga um útgáfu á Robertino í Kína, og hef verið iðinn við að kynna íslenska tónlist þar," segir Óttar, sem skrifaði nýverið undir samning um dreifingu á plötum Robertino í Benelux-löndunum, Þýskalandi, Austurríki og Sviss.

Fyrsta íslenska platan kom út í Kína fyrir skömmu en þar var um að ræða plötu með Jazzkvartett Sigurðar Flosasonar & Jóels Pálssonar. Að sögn Óttars eru fjölmörg sóknarfæri á kínverskum tónlistarmarkaði sem vex með ógnarhraða.

Sjá nánar í Morgunblaðinu í dag.