Paris Hilton þreytt á óperudansleik í Vín

Svo virðist sem hótelerfingjanum Paris Hilton hafi leiðst hræðilega á óperudansleik í Vín í gærkvöldi. Að minnsta kosti geispaði hún stöðugt og lét lítið fara fyrir sér á dansgólfinu.

Bein útsending var frá dansleiknum sem er einn aðalviðburðurinn í samkvæmislífi Vínarborgar í Austurríki.

Þegar prúðbúið fólk streymdi inn í salinn sást til Parisar þar sem hún hvíldi höfuðið í höndum sér. Þess á milli fletti hún dagskránni og fiktaði við farsímann.

Hilton var gestur Richard Lugner, sem er mjög áberandi í fasteignaviðskiptum í Austurríki, en hann hefur þann sið að bjóða frægum konum með sér á dansleikinn. Meðal fylgdarmeyja hans undanfarin ár eru: Geri Halliwell, Pamela Anderson og Carmen Electra.

Í dag ætlar Hilton að fara á skíði í Ischgl og um leið fagna 26 ára afmælinu.