Eiríkur verður með í sjónvarpsþáttum um Söngvakeppnina

Eiríkur Hauksson átti fund í dag í Ríkisútvarpinu þar sem rætt var hvort hann tæki þátt í Inför E.S.C. samnorrænum sjónvarpsþáttum sem sænska sjónvarpið framleiðir, þar sem öll lögin sem taka þátt í Söngvakeppni evrópskra sjónvarpsstöðva eru sýnd. Fyrir fundinn sagðist Eiríkur vera á báðum áttum um hvort hann ætti að taka þátt en nú er niðurstaðan komin og ljóst er að Eiríkur mun láta slag standa og vera með í Inför E.S.C.

„RÚV stendur með mér í þessu og við látum bara slag standa," sagði Eiríkur Hauksson í viðtali við Fréttavef Morgunblaðsins fyrir skömmu.

Eiríkur er meðvitaður um að það fylgi því ákveðin vandkvæði að hann skuli jafnframt vera einn af þátttakendunum í Söngvakeppninni. „Þetta verður vandmeðfarið en ég verð bara að höndla það og ég er búinn að ákveða vissa hluti. Það verður að sjálfsögðu að halda galsanum í þessu og auðvitað verður þetta létt og leikandi en ég reikna með að þurrka út núllið. Það er að mínu mati lágmarks kurteisi við keppendur," sagði Eiríkur.

• 1 blogg um fréttina

Bloggað um fréttina

• Brosveitan - Pétur Reynisson: Jeii !