Von á tveimur ástarvikubörnum í Bolungarvík

Ástarvikan í Bolungarvík er haldin árlega með það að markmiði að fjölga Bolvíkingum. Staðfest hefur verið að von sé á tveimur ástarvikubörnum í Bolungarvík í maí.

Soffía Vagnsdóttir, frumkvöðull að hátíðinni, segir að mikil tilhlökkun ríki í Bolungarvík, enda hafi aðeins eitt ástarvikubarn fæðst síðan hátíðin var fyrst haldin. Þetta kemur fram á Bæjarins besta.

Segir Soffía að nú þegar sé farið að varpa fram hugmyndum fyrir næstu Ástarviku, enda sé ekki ætlunin að slaka á í þessu átaki til að fjölga Bolvíkingum.

Soffía segir einnig að verið sé að skoða samstarfsaðila að hátíðinni, svo hún megi verða enn veglegri. Bolvíkingar eru því hvergi af baki dottnir þó ekkert ástarvikubarn hafi komið í heiminn á síðasta ári.

• 2 blogg um fréttina

Bloggað um fréttina

• Rúnar Birgir Gíslason: Útflutningsvara Bolvíkinga
• Jenný Anna Baldursdóttir: KÆRLEIKSBÖRN