Svívirðingar í American Idol

Idol-dómarinn Simon Cowell og Idol-kynnirinn Ryan Seacrest skiptust á svívirðingum sem aldrei fyrr í American Idol síðasta þriðjudag. Á meðan stóð einn keppandinn, Melinda Doolittle, milli steins og sleggju.

Keppandinn hafði sagt stuttu áður að hún þyldi ekki að klæðast kjólum og ganga á háum hælum. Í kjölfarið spurði Seacrest Cowell hvort hann gæti gefið einhver heilræði um háhælaða skó. Viðbrögð Cowells? „Þú ættir að vita það, Ryan." Ái!

Seacrest: „Simon, snáfaðu út úr skápnum mínum." (löng þögn)

Cowell: „Jæja, komdu þá út úr honum."

Seacrest: „Þetta snýst um 12 manna úrslitin, er það á hreinu? Ekki hvað þú vilt."

Á meðan stóð Doolittle eins og illa gerður hlutur og brosti vandræðalega. Seacrest reyndi hvað hann gat til að milda málin. „Við erum vinir," fullvissaði hann áhorfendur. Spennan í American Idol fer stigmagnandi, en eiga dómarinn og kynnirinn eftir að halda sig á mottunni? Fylgist með.