Fjöruverðlaunin veitt í fyrsta sinn: Til að efla samstöðu kvenskálda

Eftir Bergþóru Jónsdóttur begga@mbl.is
Sex konur, Þorgerður Jörundardóttir, Sigríður Dúna Kristmundsdóttir, Anna Cynthia Leplair, Margrét Tryggvadóttir, Kristín Steinsdóttir og Hélene Magnússon, hrepptu í gær Fjöruverðlaunin, bókmenntaverðlaun kvenna, er þau voru veitt í fyrsta sinn, á Góugleði, bókmenntahátíð kvenna.

Forsaga þess að efnt er til Góugleðinnar og bókaverðlaunanna er sú, að í október sl. komu saman um tuttugu konur innan Rithöfundasambands Íslands sem fannst kominn tími til að efla tengsl sín á milli og standa saman að uppákomu sem tengdist konum og ritstörfum. Hátíðin hófst með málþingi þar sem meðal annars var spurt hvernig styrkja mætti stöðu kvenrithöfunda á Íslandi; hvort íslenskar skáldkonur hefðu jafngreiðan aðgang að tækifærum og skáldkarlar og hvernig konunum farnast í jólabókaflóðinu. Hápunktur Góugleðinnar var útnefning "höfunda bókafjörunnar".

Að sögn aðstandenda Góugleðinnar verða þær raddir sífellt háværari sem segja að jólabókaflóðið og þær markaðsaðferðir, sem þá ráða ferðinni, gefi ekki rétta mynd af þeirri fjölbreyttu flóru rita sem gefin er út á Íslandi. Margar áhugaverðar bækur nái sér ekki á flot í flóðinu og drukkni jafnvel með öllu. Telja ýmsir að bókum eftir konur sé sérlega hætt við þessum örlögum. Með þetta í huga var skipuð valnefnd sem í áttu sæti Hrefna Haraldsdóttir, Vilborg Dagbjartsdóttir og Þorgerður E. Sigurðardóttir. Nefndarkonur gengu fjöruna eftir jólabókaflóðið, tíndu upp bækur eftir konur sem út komu á síðasta ári og ekki hlutu verðskuldaða athygli og völdu þá fimm titla sem þeim þótti skara fram úr.