Björk stígur á svið í Laugardalshöll í kvöld

Björk heldur sína fyrstu tónleika hér á Íslandi í sex ár í Laugardalshöll í kvöld. Þetta verða fyrstu tónleikarnir í heimstónleikaferð Bjarkar til kynningar á nýrri breiðskífu, Volta, sem kemur út um heim allan þann 7. maí.

Þetta verður í fyrsta sinn sem ný lög af þessari plötu munu hljóma, en á prógramminu eru líka eldri lög af fyrri plötum Bjarkar. Breska hljómsveitin Hot Chip mun heimsækja Ísland að nýju og leika á eftir Björk í Höllinni.

Björk fer á svið stundvíslega klukkan 20, en húsið opnar 18:30.

Antony Hegarty, betur þekktur sem Antony & the Johnsons, er kominn til landsins vegna tónleikana og mun syngja 1-2 lög með Björk í kvöld, að því er segir í tilkynningu frá skipuleggjendum tónleikanna.

Enn eru til miðar á tónleikana. Miðasala fer fram í Laugardalshöll frá kl. 12 í dag og verða miðar seldir fram að tónleikum - svo lengi sem miðamagn leyfir. Miðasala fer einnig fram á www.midi.is. Miðaverð er 3.900 krónur í stæði, 6.900 í stúku.

Aldurstakmark á tónleikana er 18 ár, nema í fylgd með fullorðnum.

• 2 blogg um fréttina

Bloggað um fréttina

• Gunnar Freyr Hafsteinsson: Lá á hleri i laugardal og náði textabroti
• Sigfús Sigurþórsson.: 18 ára aldurstakmark?