Tobey Maguire setur sjálfan sig í leðurbann

Leikarinn Tobey Maguire hefur verið grænmetisæta í 14 ár og hefur nú ákveðið að ganga skrefi lengra og hætta að klæðast fatnaði sem gerður er úr leðri. Auk þess afpantaði hann leðurinnréttingu í nýja bílinn sinn, og gengur eingöngu í strigaskóm og öðrum álíka skófatnaði.

Auk þess að borða ekki kjöt neytir Tobey ekki heldur eggja, osts og mjólkur. Hann sagði í viðtali við tímaritið Parade: „Mér hefur aldrei fundist þetta erfitt. Mig hefur í rauninni aldrei langað mikið í kjöt. Þegar ég var lítill átti ég meira að segja í mestu erfiðleikum með að borða kjöt. Það mátti ekki vera nein fita eða bein á því.“

Tobey hefur einnig greint frá því að hann sé að hugsa um að flytjast frá Los Angeles vegna fimm mánaða gamallar dóttur sinnar, Ruby, sem hann á með unnustu sinni, Jennifer Meyer. Hann segist þurfa að fara að hugsa fyrir því hvar hann vilji að Ruby alist upp og gangi í skóla. Þótt LA sé að mörgu leyti afslöppuð borg segist Tobey ekki frá því að ráðlegt væri að finna einhvern stað þar sem ekki sé jafn ríkur samkeppnisandi og í borginni.

• 1 blogg um fréttina

Bloggað um fréttina

• Þorsteinn Gunnarsson: Enda meira fyrir latexið