Geir Haarde tók Johnny Cash

Geir H. Haarde, forsætisráðherra og formaður Sjálfstæðisflokksins, er mikill söngvari eins og alþjóð veit og notar hvert tækifæri sem gefst til að þenja raddböndin. Eitt slíkt tækifæri bauðst honum á lokahófi landsfundarins á laugardag en þar steig Geir á svið og söng gamla Johnny Cash-lagið „Walk the Line" við íslenskan texta sr. Hjálmars Jónssonar dómkirkjuprests og fyrrverandi þingmanns Sjálfstæðisflokksins.

Var söngnum og textanum svo vel tekið af veislugestum að þegar hljómsveitin Baggalútur hóf leik síðar um kvöldið var Geir fenginn til að syngja lagið aftur við viðeigandi undirleik og nú við hálfu meiri fögnuð viðstaddra.