Knúti hótað lífláti

Dýragarðurinn í Berlín fékk í morgun símbréf með líflátshótun sem beindist gegn hinum víðfræga hvítabjarnarhúni Knúti. Lögreglan telur fyrir víst að um gabb sé að ræða og ekki verður hætt útivistartíma Knúts í dag.

Knútur viðrar sig tvisvar á dag og dregur hann um 15 þúsund áhorfendur á degi hverjum. Lögreglan mun hafa rannsakað búrið sem Knútur dvelur í og útivistarsvæðið hans en stjórnendur dýragarðsins hafa neitað því sem fram kom í blaðinu Bild að Knútur nyti nú lögregluverndar.

Öryggisverðir dýragarðsins gæta Knúts eins og venjulega. Knútur er með sína eigin blogg-síðu og sjónvarpsþátt og hefur nýlega birst á forsíðu bandaríska tímaritsins Vanity Fair með Leonardo DiCaprio en eins og frægt er orðið kom DiCaprio hingað til lands fyrir sína myndatöku en myndunum var síðan skeytt saman.

Fyrr í vikunni þurfti Knútur að halda sig innan dyra þar sem hann var með vott af flensu og verki vegna þess að hann er að taka tennur.

• 1 blogg um fréttina

Bloggað um fréttina

• Linda: Æi littli ísbjörn