Ólíklegt að prinsessan fái tískunafn

Mikil spenna ríkir nú í Danmörku yfir því hvað litla prinsessan verði látin heita en nýfædd dóttir krónprinshjónanna er fyrsta prinsessan sem fæðist í Danaveldi frá árinu 1946. Veðbankinn Ladbrokes veðjar á að hún verði nefnd Margrét að fyrsta nafni í höfuð ömmu sinnar Margrétar Þórhildar Danadrottningar. Minnstar líkur telur bankinn hins vegar vera á því að prinsessan verði nefnd Lotte eða Nanna. Þetta kemur fram á fréttavef Jyllands-Posten.

Vilji fólk veðja á Lotte- eða Nönnu-nafnið hjá Ladbrokes á það möguleika á að fá þá upphæð sem lögð er undir 101 sinni til baka verði annað hvort þessara nafna fyrir valinu sem fyrsta nafn stúlkubarnsins.

Samkvæmt óformlegri könnun vefjar Jyllands-Posten gera lesendur einnig fastlega ráð fyrir því að eitt af nöfnum stúlkunnar verði Margrét, Ingrid eða Henriette en hefð er fyrir því innan dönsku konungsfjölskyldunnar að fólk beri fjögur skírnarnöfn.

Fáir gera hins vegar ráð fyrir að stúlkan verði nefnd Mathilde eða Sophie þrátt fyrir að þetta séu vinsælustu kvenmannsnöfnin í Danmörku í dag.

Litla prinsessan með foreldrum sínum Friðriki krónprins Danmerkur og Mary krónprinsessu. Reuters

• 1 blogg um fréttina

Bloggað um fréttina

• Ragnar Bjarnason: Líklegast