Rokkaramóðir látin

Móðir rokkarans Keith Richards lést um nýliðna helgi. Doris Richards var orðin 91 árs og lést í svefni eftir langa baráttu við krabbamein.

Keith sonur hennar, sem er orðinn 63 ára, sat við rúmstokk móður sinnar seinustu dagana.

Doris skildi við Bert, föður Keith, árið 1962. Hann lést 84 ára að aldri árið 2002. Til dauðadags bjó hún með stjúpföður rokkarans, William, í Kent-héraði í Englandi. Það var Doris sem keypti fyrsta gítarinn handa Keith og gaf honum í 15 ára afmælisgjöf. Faðir hennar, Gus Dupree, var djasstónlistarmaður og kenndi dóttursyni sínum á gítarinn.