Hugh Grant beðinn afsökunar á slúðri

Hugh Grant hefur samið við útgefanda slúðurblaðanna Daily Mail og Mail on Sunday í meiðyrðamáli sem hann höfðaði vegna skrifa um sambandsslit hans og Jimimu Khan, sem hann átti í sambandi við um þriggja ára skeið. Blöðin höfðu haldið því fram að sambandsslit þeirra mætti rekja til daðurs við kvikmyndaframleiðanda og viðbragða leikarans við brúðkaupi fyrrverandi unnustu hans, Elizabeth Hurley. Þetta kemur fram á fréttavef Sky News.

Grant var ekki viðstaddur réttarhöldin, en sagði í yfirlýsingu sem hann sendi frá sér að hann hefði gripið til aðgerða vegna þess að hann hefði verið þreyttur á því að blöðin birtu fréttir af einkalífi hans sem væru úr lausu lofti gripnar.

Simon Smith, lögmaður Grant, segir að staðhæfingarnar hafi ekki verið bornar undir Grant fyrir birtingu þeirra og að sannleikurinn sé sá að ekkert hafi verið hæft í þeim. Útgefandinn, Associatied Newspapers, hefur beðist afsökunar opinberlega, og heitið því að birta fullyrðingarnar ekki aftur. Ekki er vitað hve há skaðabótagreiðslan til Grant er, en útgefandinn mun greiða allan lögfræðikostnað Grant.

• 1 blogg um fréttina

Bloggað um fréttina

• Fanney Dóra Sigurjónsdóttir: Maðurinn minn II