Ron Jeremy meðal aðdáenda

Valdís Þorkelsdóttir er einn tíundi hluti hóps blásara sem ferðast nú um heiminn með Björk Guðmundsdóttur. Valdís párar niður hugrenningar sínar og fréttir frá ferðinni á bloggsíðu sína.

Hópurinn er nú kominn til New York þar sem fyrirhugaðir eru þrennir tónleikar. Í síðustu viku lék hópurinn sem kunnugt er á tónlistarhátíðinni í Coachella-eyðimörkinni.

Valdís segist hafa þekkt leikkonuna Cameron Diaz meðal tónleikagesta en baksviðs beið þeirra einhverju sinni Ron Jeremy. Hann vildi að sögn fá að heilsa upp á hópinn en hafði ekki erindi sem erfiði.

Kelly Osbourne, dóttir eilífðarrokkarans Ozzy, bjargaði svo málunum þegar hún lánaði nokkrum „uppábúnum brasspíum" úr sveitinni hárlakk.