Timberlake vill hætta í poppinu

Justin Timberlake langar að hætta í poppinu og snúa sér að sveita- og sálartónlist.

Timberlake er orðinn 26 ára og segist vera orðinn þreyttur á sviðsljósinu. Hann ætlar því að hverfa aftur til æskuslóðanna í Tennessee og kynna sér aðrar tónlistarstefnur en hann hefur fengist við hingað til. „Ég hef verið mikið í sviðsljósinu og mér finnst ég ekki þurfa meira af því í bili. Mig langar bæði að semja sveita- og sálartónlist því ég ólst upp í Tennessee," sagði söngvarinn í samtali við USA Today. Hann hefur nú þegar samið tónlist fyrir listamenn á borð við Macy Gray og Rihanna og langar að gera meira af því að semja fyrir aðra.

„Stundum finnst mér að eina leiðin til þess að tjá mig almennilega sé í gegnum aðra. Ég verð að fá smáhvíld áður en ég fer að semja fyrir sjálfan mig að nýju. Ég get ekki framleitt 20 lög í viðbót eins og ekkert sé, og búist við því að þau séu eins og „What Goes Around"," bætti Timberlake við, en hann hefur að undanförnu reynt fyrir sér á hvíta tjaldinu.

Hann hefur nú þegar leikið í Alpha Dog og Black Snake Moan, auk þess sem hann talaði inn á teiknimyndina „Shrek the Third".