Ekkert ofbeldi fyrir leikarabörnin

Brad Pitt og Angelina Jolie hafa bannað börnum sínum alfarið að horfa á þær myndir sem þau hafa leikið í og innihalda ofbeldi. Þá hafa þau einnig bannað börnunum að leika sér með leikfangabyssur. „Angelina vill ekki að börnin sjái myndir þar sem hún lætur ofbeldi líta vel út. Í flestum af hennar þekktustu hlutverkum gengur hún með vopn og beitir ofbeldi," sagði heimildarmaður í samtali við dagblaðið The Sun.

Pitt og Jolie kynntust við gerð myndarinnar Mr. and Mrs. Smith sem fjallaði um leigumorðingja. Þau eru nú stödd í Prag í Tékklandi þar sem Jolie er við tökur á myndinni Wanted þar sem hún leikur á móti Morgan Freeman. Myndin fjallar um mann sem kemst að því að faðir hans var leigumorðingi, og þjálfar sig í kjölfarið upp í sama starf.

Jolie á þrjú ættleidd börn og eitt barn með Pitt.