Hundrað ár frá fæðingu Hergé

Tinni er í miklum metum í Belgíu, enda var höfundurinn Hergé belgískur. Hundrað ár eru á morgun frá fæðingu Hergé og verður ýmislegt gert til að fagna því í Belgíu. Frímerki sem teiknarinn prýðir verður gefið út og nýtt safn tileinkað höfundinum og aðalpersónunni knáu verður opnað í bænum Louvain-la-Neuve.

Þá heldur ríkissjónvarpsstöðin RTBF upp á daginn með því að halda keppni og fær sigurvegarinn að launum ferð til Suður Ameríku á slóðir Inkamúmíunnar Raskar Kaspak, sem olli usla í bókunum Sjö kraftmiklar kristalskúlur og Sólhofið.

Að sögn talsmanna forlagsins Moulinsart, sem gefur út bækurnar um Tinna, er þó besta afmælisgjöfin sú að til stendur að kvikmynda sögurnar um Tinna og Kolbein kaftein. Herma fregnir að leikstjórarnir Steven Spielberg og Peter Jackson ætli í sameiningu að gera í það minnsta þrjár myndir um blaðamanninn og spæjarann knáa.

• 2 blogg um fréttina

Bloggað um fréttina

• Steingrímur Rúnar Guðmundsson: Hergé 100 ára
• Stefán Örn Viðarsson: Kynhneigð Tinna