Rúmenskur leikstjóri fékk gullpálmann í Cannes

Rúmenski leikstjórinn Cristian Mungiu fékk í kvöld gullpálmann á kvikmyndahátíðinni í Cannes fyrir myndina 4 mánuðir, 3 vikur og 2 dagar.. Suður-kóreska leikkonan Jeon Do-yeon var valin besta leikkonan á hátíðinni fyrir myndina Secret Sunshine. Rússinn Konstantin Lavronenkó var valinn besti karlleikarinn fyrir myndina Bannfæringuna eftir Andrei Zviagintsev.

Mynd Mungiu fjallar um stúlku sem gengst undir ólöglega fóstureyðingu í smábæ í Rúmeníu á tímum kommúnistastjórnar Nicolae Ceaucescu á síðustu öld. Nafn myndarinnar vísar til aldurs fóstursins þegar því er eytt. „Þetta er eins og ævintýri," sagði Mungui eftir að bandaríska leikkonan Jane Fonda hafði afhent honum gullpálmann. Hann bætti við að ekki væri nauðsynlegt að hafa mikið fjármagn og stórstjörður til að segja sögur.

Bandaríkjamaðurinn Julian Schnabel var valinn besti leikstjóri hátíðarinnara fyrir myndina Kafarabjallan og fiðrildið. Myndin er á frönsku og er byggð á endurminningum fransks ritstjóra, sem fær heilablóðfall og lamast en lærir að skrifa á ný með því að depla augnalokunum.

Þá fékk japanska kvikmyndin Morgunskógurinn, sem fjallar um dauða og sorg, svonefnd Grand Prix verðlaun. Svonefnd dómnefndarverðlaun fengu teiknimynd um líf ungrar stúlku í Írak og kvikmynd eftir mexíkóska leikstjórann Carlos Reygadas um mennonítasamfélag í Mexíkó.

Þá fékk bandaríski leikstjórinn Gus Van Sant sérstök verðlaun, sem veitt voru í tilefni þess að Cannes-hátíðin er 60 ára. Van Sant fékk verðlaunin fyrir myndina Paranoid Park.