Þarf vodka fyrir kynlífssenur

Leikkonan Eva Mendes þurfti að fá sér vodkalögg til þess að róa taugarnar fyrir tökur á kynlífssenum með Joaquin Phoenix. Senurnar eru í myndinni We Own the Night og ber leikkonan Phoenix og leikstjóranum James Gray vel söguna.

„Þetta voru fyrstu kynlífssenurnar sem ég hef leikið í og ég þakka guði fyrir að James Gray var leikstjórinn. Þetta voru síðustu tökurnar og ég átti orðið mjög þægilegt samband við James og Joaquin." Hún líkir leikaranum ennfremur við lítinn hvolp en bætir svo við í öllu meiri alvöru að hann sé klárlega einn besti leikari sinnar kynslóðar. We Own the Night gerist í undirheimum New York-borgar og má reikna með henni í kvikmyndahús næsta vetur.