Drossía geymd í jörðu í hálfa öld
Setja bókamerki
Það var mikið um dýrðir í borginni Tulsa í Oklahoma um helgina en þá var bíll af gerðinni Plymouth Belvedere Sport, sem grafinn var í jörðu framan við dómhús borgarinnar fyrir hálfri öld, grafinn upp á ný. Bíllinn verður nú gerður upp og sá, sem árið 1957 fór næst því að giska á hve margir íbúar yrðu í borginni árið 2007, fær bílinn til eignar. Sé sá látinn fá erfingjar hans bílinn.
Oklahoma átti 50 ára afmæli 15. júní árið 1957 og þá fékk einhver þá hugmynd, að grafa nýjan lúxusbíl í jörðu í Tulsa og grafa bílinn síðan upp þegar ríkið yrði 100 ára. Bíllinn var fylltur með ýmsum munum, svo sem hárspennum, varalit, bjór, verkjatöflum og bensínbrúsa, svo nokkuð sé nefnt, svo íbúar borgarinnar árið 2007 gætu séð hvernig þróunin hefði orðið. Jafnframt fór fram samkeppni þar sem borgarbúar gátu giskað á hve margir íbúar yrðu í borginni árið 2007. Sá sem næst kæmist réttu tölunni átti að fá bílinn og 1200 dali að launum.
Sigurvegarinn verður kynntur við athöfn næsta föstudag. Verkstæði í borginni hefur fengið það hlutverk að sjá um að bíllinn verði ökufær. „Við erum bjartsýnir en þó höfum við nokkrar áhyggjur af ryði í gólfinu," sagði Boyd Coddington, verkstæðiseigandi, við AP.
Íbúar Tulsa voru 382.457 um síðustu áramót.
Reiðubúin að aflýsa verkföllum í fjórum leikskólum
Drónamyndskeið frá hápunkti gossins í nótt
Hópur fólks reyndi að komast að eldgosinu
Litlar líkur á að hraunið nái til mannvirkja
Dómur þyngdur um þrjú ár
Hentugt gos fyrst gýs á annað borð
Viðræður ekkert þokast frá því á þriðjudag