Björgvin Halldórsson og Ragnar Bjarnason syngja saman

Eftir Birtu Björnsdóttur birta@mbl.is
Þótt hvor um sig hafi sungið dúetta með fjölda íslenskra söngvara hafa leiðir þeirra aldrei legið saman í söngnum, fyrr en í gær.

Þeir Björgvin Halldórsson og Ragnar Bjarnason hljóðrituðu sinn fyrsta dúett í gær. Lagið sem varð fyrir valinu nefnist Barn og er eftir Ragnar sjálfan, við ljóð Steins Steinars.

Lagið er eitt fjölmargra sem prýða munu væntanlega plötu í flokki Íslandslaga, þá sjöundu í röðinni.

„Við Raggi höfum aldrei áður sungið saman á plötu og í raun bara aldrei sungið saman sem er í raun alveg ótrúlegt. Það má því segja að þetta hafi verið söguleg stund í gær," sagði Björgvin í samtali við Morgunblaðið. Og hann varð ekki fyrir vonbrigðum með dúettinn.

„Það var auðvitað bara æðislega gaman að syngja með Ragga. Við vorum einmitt að furða okkur á því hvers vegna við hefðum ekki gert þetta fyrr."

Nánar er fjallað um þetta í Morgunblaðinu í dag.