Paris Hilton fram yfir Michael Moore

Kvikmyndaleikstjórinn Michael Moore kvartaði undan því í gær að hafa ekki fengið þjónustu í verðbréfahöllinni í New York vegna viðtals sem tekið var við hann á CNBC-fréttastöðinni. Í fyrradag var viðtali við hann hjá Larry King slegið á frest á síðustu stundu, en Paris Hilton fengin í staðinn.

„Ég fer nú að taka þetta persónulega," sagði Moore, en mynd hans, Sicko, þar sem hann gagnrýnir ítök bandaríska fyrirtækjaheimsins í heilbrigðisþjónustunni þar í landi hefur valdið talsverðum titringi í fjármálaheiminum. „Forgangsröðunin í þessu landi er verulega bjöguð," sagði Moore hundfúll.